Forsíða

Innritun í framhaldsskóla fyrir haustönn 2015

Forinnritun lokið – Unnið úr umsóknum
Innritun 10. bekkinga í framhaldsskóla lauk á miðnætti þann 10. júní sl. Nú er verið að vinna í umsóknum og koma öllum nemendum í skóla. Niðurstöður liggja fyrir í fyrsta lagi nk. föstudag eða eftir þá helgi, 22.-23. júní. Við gerum okkur grein fyrir að nemendur eru óþreyjufullir, en biðjum ykkur að sína biðlund, þetta tekur allt sinn tíma. Þið getið fylgst með stöðu umsókna á Menntagáttinni, en einnig munum við setja inn tilkynningu á Facebook þegar niðurstöðurnar verða birtar.

Forinnritun lokið – Hvert sækja nemendur?
Forinnritun 10. bekkinga í framhaldsskóla lauk á miðnætti 10. apríl. Alls tóku 3.824 nemendur þátt og eru því um 88% allra 10. bekkinga búnir að velja sér framhaldsskóla. Kvennaskólinn í Reykjavík, Menntaskólinn við Hamrahlíð og Verzlunarskóli Íslands, fengu flestar umsóknir en alls settu 30% nemenda sem sóttu um, einhvern þessara þriggja skóla í fyrsta val. Það er því ljóst að mun fleiri nýnemar vilja komast í þessa skóla en þeir geta tekið við. Þetta eru svipaðar niðurstöður og verið hafa úr forinnritunum síðustu ára. Nemendur hafa möguleika á því að sækja um eða breyta umsóknum sínum frá 4. maí til 10. júní næstkomandi. Innritun eldri nemenda (fæddra 1998 og fyrr) stendur nú yfir og lýkur þann 31. maí nk.

Forinnritun nemenda í 10. bekk mun standa yfir
dagana 4. mars til 10. apríl

Forinnritun nemenda í 10. bekk (fæddir 1999 eða síðar) hefst miðvikudaginn 4. mars og lýkur föstudaginn 10. apríl. Nemendur fá bréf frá Námsmatsstofnun með veflykli að innritunarvef og leiðbeiningum sem afhent verður í grunnskólunum. Foreldrar/forráðamenn nemenda fá bréf í pósti frá Námsmatsstofnun með upplýsingum um innritunina. Nemendur í 10. bekk eru eindregið hvattir til að taka þátt í forinnrituninni.

Innritun á starfsbrautir fyrir fatlaða verður 2. til 28. febrúar
Rafræn innritun á starfsbrautir fyrir fatlaða stendur yfir dagana 2. til 28. febrúar. Tímamörk almennrar innritunar gilda þó fyrir umsóknir sem berast eftir þann tíma. Stefnt er að afgreiðslu allra umsókna á starfsbrautir fyrir lok apríl.

Lista yfir skóla sem bjóða upp á starfsbrautir fyrir fatlaða er að finna undir flipanum „upplýsingar“ hér til hliðar.

Innritun annarra en 10. bekkinga verður 1. apríl til 31. maí
Innritun eldri nemenda (fæddir 1998 eða fyrr) sem eru ekki í framhaldsskóla sem stendur eða ætla að skipta um skóla hefst miðvikudaginn 1. apríl og lýkur sunnudaginn 31. maí. Umsækjendur 17 ára og eldri nota auðkenni frá island.is eða rafræn skilríki á greiðslukorti. Ef sótt er um Íslykil á netinu er hægt að velja um að fá hann sendan á lögheimili, sem tekur 2-5 virka daga eða í netbanka, sem skilar sér samdægurs (undir „rafræn skjöl“). Rafræn persónuskilríki er hægt að sækja um hjá viðskiptabanka.

Lokainnritun nemenda í 10. bekk verður 4. maí til 10. júní
Nemendur í 10. bekk hafa frest til sækja um nám í framhaldsskóla eða breyta umsóknum úr forinnritun til miðnættis miðvikudaginn 10. júní. Einkunnir þeirra verða sendar rafrænt frá grunnskólum til framhaldsskóla eftir skólaslit.

Fjar- og dreifnám og nám í kvöldskóla
Innritun í fjar- og dreifnám og í kvöldskóla fer fram samkvæmt fyrirkomulagi sem einstakir framhaldsskólar auglýsa.

Allar nánari upplýsingar eru veittar í síma 550 2400 eða með því að senda tölvupóst á netfangið innritun@namsmat.is